Mae busnes cynllunio ariannol personol sydd wedi bod yn cynghori aelwydydd ers dros 20 mlynedd yn edrych ymlaen at dwf yn y dyfodol, yn dilyn buddsoddiad o £100,000 gan Gronfa Buddsoddi i Gymru a gefnogir gan Fanc Busnes Prydain. Mae FW Capital yn un o dri phartner cyflawni'r gronfa, a dyma'r buddsoddiad cyntaf a wnaed gan FW Capital mewn busnes sydd wedi'i leoli yng Nghanolbarth Cymru.
Sefydlwyd Personal Asset Management Wealth, sydd wedi'i leoli yn Nhref y Clawdd, ym 1999 gan y cyfarwyddwr Mike Evans ac ers hynny mae wedi mynd ymlaen i helpu cannoedd o gleientiaid ledled Canolbarth Cymru, trwy ddarparu cyngor ar forgeisi, buddsoddiadau, pensiynau a rhwymedigaethau treth.
Lansiwyd Cronfa Buddsoddi i Gymru, a gefnogir gan Fanc Busnes Prydain, yn 2023 ac mae'n gweithredu ledled Cymru gyfan. Mae'r gronfa'n cynnwys ystod o opsiynau cyllido gyda benthyciadau o £25,000 i £2 filiwn a buddsoddiadau ecwiti hyd at £5 miliwn i helpu busnesau bach a chanolig i gychwyn, ehangu neu aros ar y blaen. Mae FW Capital yn gyfrifol am fenthyciadau mwy o £100,000 i £2 filiwn.
Mae Cronfa Buddsoddi i Gymru yn helpu i gynyddu cyflenwad ac amrywiaeth cyllid cyfnod cynnar drwy ddarparu opsiynau i fusnesau llai na fyddent fel arall yn derbyn buddsoddiad. Mae'r cyllid wedi'i gynllunio i helpu busnesau gyda gweithgareddau gan gynnwys ehangu, arloesi cynnyrch neu wasanaeth, prosesau newydd, datblygu sgiliau ac offer cyfalaf.
Mae'r cyllid diweddaraf hwn wedi galluogi Personal Asset Management Wealth i ddechrau cynllunio ar gyfer recriwtio dau gynghorydd ariannol ychwanegol. Mae gan y cwmni fwy na 550 o gleientiaid ac mae'n rheoli bron i £60 miliwn mewn cronfeydd dan reolaeth. Ar hyn o bryd mae'n cyflogi dau Gynghorydd Ariannol Rheoleiddiedig llawn amser ynghyd â dau aelod o staff cymorth rhan-amser a Rheolwr Swyddfa Llawn Amser.
Mae'r Cyfarwyddwr Ian Cadwallader yn un o ddau Gynghorydd Ariannol yn y busnes ac mae wedi gwasanaethu fel rhan o'r tîm ers 2001.
Ian Cadwallader: “Mae’r gefnogaeth rydyn ni wedi’i chael drwy Gronfa Buddsoddi i Gymru wedi rhoi’r cyfle i ni edrych ymlaen at gyflogi cynghorwyr newydd, a fydd yn ein helpu i dyfu ein busnes a chynnal ein hymrwymiadau rheoleiddio.
“Fel busnes lleol, teuluol sydd wedi dod i adnabod ein cleientiaid yn iawn dros yr ychydig flynyddoedd diwethaf, roedd yn bwysig i ni ein bod ni’n gallu cynnal y perthnasoedd hirdymor, wyneb yn wyneb hynny o fewn cymunedau ac aelwydydd yng Nghanolbarth Cymru.
“Gyda 550 o gleientiaid, ni allem gynnal adolygiadau gyda dim ond dau gynghorydd - bydd y benthyciad hwn yn caniatáu inni gyflogi dau arall yn y flwyddyn nesaf, sy'n golygu y gallwn barhau i adeiladu ar y gwasanaeth rydym wedi'i ddarparu'n lleol ers degawdau.”
Rhodri Evans, Rheolwr Cronfa yn FW Capital : “Mae Personal Asset Management Wealth yn gynghorwyr dibynadwy, gyda sylfaen cwsmeriaid wedi’i hadeiladu dros ddegawdau o berthnasoedd cryf â chartrefi a chymunedau lleol. Rydym yn falch iawn mai nhw yw’r buddsoddiad cyntaf rydym wedi’i wneud yn y rhan hon o Gymru, a bydd y gefnogaeth dargedig a ddarperir gan y Gronfa yn eu helpu i dyfu ac ehangu eu gwaith i sylfaen cwsmeriaid hyd yn oed yn fwy yn y dyfodol.”
Dywedodd Bethan Bannister, Uwch Reolwr Buddsoddi, Cronfeydd Buddsoddi Cenhedloedd a Rhanbarthau ym Manc Busnes Prydain: “ Lansiwyd Cronfa Buddsoddi i Gymru gwerth £130m gan Fanc Busnes Prydain i gefnogi busnesau llwyddiannus sydd ag uchelgeisiau twf. Mae'n wych gallu cefnogi Personal Asset Management Wealth yn eu cynlluniau parhaus ar gyfer ehangu.
“Mae’n wych gweld FW Capital yn defnyddio Cronfa Buddsoddi i Gymru yn y rhanbarth hwn o Gymru. Mae ehangiad Personal Asset Management Wealth yn cryfhau eu henw da hirhoedlog a gobeithiwn y bydd y buddsoddiad hwn a gyflawnir trwy FW Capital yn cyfrannu at eu llwyddiant masnachol parhaus.”
Am ragor o wybodaeth, ewch i Gronfa Buddsoddi Cymru | Banc Busnes Prydain
